Senator Mushahidullah Khan speeks to the party workers and media persons

موجودہ جمہوری حکومت کو غیر جمہوری طریقے سے کام سے روکنا اقتصادی ترقی پر خود کش دھماکے کے مترادف ہے ۔ سینیٹر مشاہدا للہ خان

پاکستان مسلم لیگ (ن) کے مرکزی سیکرٹری اطلاعات سینیٹر مشاہداللہ خان نے کہا ہے کہ ملک اقتدار کے میوزیکل چیئر کھیل کا متحمل نہیں ہو سکتا ۔ انھوں نے کہا کہ پاکستان کو اندرونی اور بیرونی جن چیلنجز کا سامنا ہے ان سے عہدہ برآہ ہونے کے لئے سیاسی استحکام ناگزیر ہے ۔ مشاہداللہ خان نے کہا کہ بار بار ملکی نظام کو سیاسی عدم استحکام کا شکار کرنے کی وجہ سے پاکستان کے جمہوری ادارے مضبوط ہو سکے اور نہ ہی کسی شعبے میں ترقی کی منزل طے کی جاسکی ۔ انھوں نے ان خیالات کا اظہار وطن واپسی پر کارکنان اور میڈیا کے بعض نمائندوں کے ساتھ بات چیت کرتے ہوئے کیا۔ مشاہداللہ خان نے کہا کہ عمران خان سمیت تمام سیاسی جماعتیں کسی نہ کسی طرح سے اقتدار کا حصہ ہیں ۔ بہتریہی ہے کہ ہر جماعت عوام کے دیئے گئے مینڈیٹ کے مطابق ڈیلیور کر ے۔ انھوں نے کہا کہ دنیا دیکھ بھی رہی ہے اور یہ تسلیم بھی کرتی ہے کہ پاکستان میں قائم مسلم لیگ (ن) کی جمہوری حکومت معاشی استحکام کے حصول کے لئے اہم اور دور رس اثرات کے حامل اقدامات کر رہی ہے ۔ مشاہداللہ خان نے کہا کہ موجودہ جمہوری حکومت کو غیر جمہوری طریقے سے کام سے روکنا اقتصادی ترقی پر خود کش دھماکے کے مترادف ہے ۔ انھوں نے کہا کہ ہمیں باہمی اختلافات کو بھلا کر صرف اور صرف ملک کو آگے لے جانے اور بحرانوں کے حل کے لئے سانسوں میں سانسیں ملا کر جنگی بنیادوں پر کام کرنے کی ضروت ہے ۔ مشاہداللہ خان نے کہا کہ پرویز خٹک کا پولیو کے خاتمے کے لئے بلائے گئے اجلاس میں شرکت کرنا نہایت ہی خوش آئند اور نیک شگون ہے ۔ انھوں نے کہا کہ سب کو اپنی اپنی سیاست کرنے کا حق حاصل ہے لیکن پاکستان کے مستقبل ، اس کی ترقی اور عوام کی بہتری پر سیاست جائز نہیں ۔