Mushahidullah Khan on Govt’s ulterior motives through Fake NAB cases

حدیبیہ پیپرز ملز اور اتفاق فاؤنڈریز کے خلاف ریفرنسز جھوٹ کا پلندہ ہیں۔ مشاہداللہ خان 

پیپلز پارٹی پر قائم مقدمات کو ختم کرنے کے لیے اسے NROکا سہارا لینا پڑا جبکہ مسلم لیگ (ن) کی قیادت

نے تمام مقدمات کا عدالتوں میں سامنا کیا

نواز شریف کو NROکو کالا اور استثنائی قانون قرار دینے اور پارلیمنٹ سے اس کی منظوری کی راہ میں رکاوٹ بننے

کی سزا دینے کی کوششیں کی جا رہی ہیں

مسلم لیگ (ن) قومی معاملات پر اپنے اصولی موقف سے ایک بھی انچ پیچھے نہیں ہٹے گی

پاکستان مسلم لیگ (ن) کے مرکزی سیکرٹری اطلاعات مشاہد اللہ خان نے کہا ہے کہ پاکستان مسلم لیگ (ن) کی قیادت کا ماضی بے داغ اور دودہائیوں کے دوران ان کا کردار قوم کے سامنے ہے۔انہوں نے کہاکہ نواز شریف یا ان کے خاندان نے کبھی عدالتوں سے ماوراء کوئی رعایت طلب نہیں کی ۔حدیبیہ پیپرز ملز اور اتفاق فاؤنڈریز کے خلاف ریفرنسز جھوٹ کا پلندہ ہیں ۔انہوں نے کہا کہ پیپلز پارٹی کے سابقہ ادوار اور جنرل مشرف کے 9سال کے دوران ان بے بنیاد مقدمات سے کچھ برآمد نہ کیا جا سکا،موجودہ حکومت کوبھی شرمندگی کا سامنا کرنا پڑے گا۔مشاہد اللہ خان نے کہا کہ پیپلز پارٹی اور اس کے اتحادی نواز شریف اور مسلم لیگ (ن) کو بلیک میل کرنے کے لیے نیب میں موجود ان بوسیدہ مقدمات کو استعمال کرنا چاہ رہے ہیں لیکن مسلم لیگ (ن) قومی معاملات پر اپنے اصولی موقف سے ایک بھی انچ پیچھے نہیں ہٹے گی ۔انہوں نے کہا کہ سیاسی مفاہمت کی پالیسی کرپشن اور بد عنوانی کو تحفظ دینے کے لیے استعمال کی جارہی ہے ۔مسلم لیگ (ن) اس نام نہاد “لُٹو تے پُھٹو”پالیسی کا حصہ بننے سے انکار کر چکی ہے ۔پیپلز پارٹی پر قائم مقدمات کو ختم کرنے کے لیے اسے NROکا سہارا لینا پڑا جبکہ مسلم لیگ (ن) کی قیادت نے تمام مقدمات کا عدالتوں میں سامنا کیا ۔

انہوں نے کہا کہ مسلم لیگ (ن) کا کوئی ایک بھی کارکن NROسے مستفید نہیں ہوا جبکہ پیپلز پارٹی کی قیادت NROکے ذریعے اپنی ڈوبتی ناؤ کو بچانے کے کوشش کر رہی ہے۔انہوں نے کہا کہ نواز شریف کو NROکو کالا اور استثنائی قانون قرار دینے اور پارلیمنٹ سے اس کی منظوری کی راہ میں رکاوٹ بننے کی سزا دینے کی کوششیں کی جا رہی ہیں ۔

انہوں نے کہا کہ حکومت جو چاہے کر لے مسلم لیگ (ن) حکمرانوں کو من مانیاں نہیں کر نے دیگی اور موجودہ اسمبلیوں کی مدت میں توسیع کے منصوبے کو ہر صورت میں ناکام بنا دیا جائے گا۔