Mushahid Ullah Khan on Government response to NRO in Supreme Court

حکومت اعلیٰ عدالتوں کے ساتھ تماشہ لگا کر اپنی کرپشن اور نااہلی کو چھپانا چاہ رہی ہے۔مشاہد اللہ خان
عوام عام انتخابات میں حکمران ٹولے کو بھیانک انجام سے دو چار کر دیں گے

پاکستان مسلم لیگ (ن) کے مرکزی سیکرٹری اطلاعات نے کہا ہے کہ وفاق کی جانب سے خط لکھنے کے معاملے پر سپریم کورٹ میں جمع کرائے گئے جواب نے عوام کو ایک بار پھر مایوس کر دیا ہے۔انہوں نے کہا کہ حکومت اعلیٰ عدالتوں کے ساتھ تماشہ لگا کر اپنی کرپشن اور نااہلی کو چھپانا چاہ رہی ہے ۔باربار عدالتوں کی سبکی پاکستان کے لیے عالمی سطح پر جگ ہنسائی کا سبب بن رہی ہے ۔حکومت کو اپنی ساکھ کی تو فکر نہیں ،ملک کی نیک نامی اور قومی وقار کو بھی داؤ پر لگا یا جا رہا ہے ۔
انہوں نے کہا کہ پیپلز پارٹی کچھ خدا کا خوف کرے اور عوام کو ناکردہ گناہوں کی سزا دینے کی بجائے عدالتوں سے نکل کر ان کی حالت زار پر رحم کرے۔مشاہد اللہ خان نے کہا کہ عوام عام انتخابات میں حکمران ٹولے کو بھیانک انجام سے دو چار کر دیں گے اور پیپلز پارٹی ہی سب سے زیادہ نقصان اٹھائے گی ۔