Iqbal Zafar jhagra Statement 21 sep

( 21ستمبر2013ئ)پاکستان مسلم لیگ(ن) کے مرکزی سیکرٹری جنرل اقبال ظفرجھگڑا نے کہاہے کہ چین کے ساتھ دوستی اور مضبوط تعلقات پاکستان کی خارجہ پالیسی کا اہم ترین جزہیں-انہوںنے کہاکہ پاکستان جنوبی ایشیاءکے دیگر ممالک کے ساتھ ملکر خطے میں امن کے قیام اورآئندہ نسلوں کوبے امنی سے نجات دلانے کیلئے مل کر کام کرنے کیلئے پرعزم ہیں-انہوں نے ان خیالات کااظہار چین کے شہر کمنگ میں چین کی کمیونسٹ پارٹی کے زیر اہتمام عالمی یوم امن کے حوالے منعقد کئے گئے ایک سیمینار سے خطاب کرتے ہوئے کیا- واضح رہے کہ ان دنوں پاکستان مسلم لیگ (ن) کا 12رکنی وفد اقبال ظفر جھگڑا کی سربراہی میں چین کے خصوصی دورے پر ہے- وفد میں سلیم ضیا،صدیق الفاروق،سینیٹر نزہت عامر،ارکان پارلیمنٹ شائستہ پرویز ملک،زہرہ فاطمی،ڈاکٹردرشن لعل،نیلسن عظیم،بریگیڈیئر جاوید،نہال ہاشمی، نگہت یاور علی اور ارسلان حفیظ شامل ہیں-سیمینار سے خطاب کرتے ہوئے اقبال ظفرجھگڑا نے کہاکہ چین اور جنوبی ایشیاءکے ممالک کو میکرواکنامکس پالیسیوں پررابطے کو مضبوط کرنے ،عالمی مالیاتی اداروں میں ترقی پذیر ممالک کی نمائندگی کو بہتر بنانے اور اپنی رائے کا حق دینے باہمی تجارت و سرمایہ کاری کیلئے ایک آزاد اور کھلی فضا پیدا کرنے اور بین الاقوامی برادری کو ترقی پذیر ممالک کی ترقی کیلئے اپنی امداد جاری رکھنے اورعلاقائی اور بین لاقوامی سطح پر اُن پہلوﺅں پر زیادہ توجہ دینے پر آمادہ کرناچاہیے، جن پر اب تک زیادہ توجہ نہیں دی گئی- انہوںنے کہاکہ پاکستان اور چین باہمی تعاون اور دوستی کو انتہائی اہمیت دیتے ہیں جس کا ثبوت یہ ہے کہ چینی وزیراعظم لی چنگ نے اپنا عہدہ سنبھالتے ہی رواںسال مئی میں سب سے پہلا دورہ پاکستان کا کیا- نوازشریف نے بھی وزارت عظمیٰ کا عہدہ سنبھالتے ہی چین کواپنے پہلے دورے کیلئے منتخب کیا – اس دوران گوادر سے کاشغرتک اقتصادی راہداری کے منصوبے سمیت 8 دیگر معاہدوں پر دستخط کئے گئے- اقبال ظفرجھگڑا نے کہاکہ اس وقت دونوں ملکوں کے درمیان12ارب ڈالر سالانہ کی تجارت ہو رہی ہے اور موجودہ تعاون کی روشنی میں یہ بات یقین سے کہی جا سکتی ہے کہ 2015ءتک باہمی تجارت 15ارب ڈالر تک پہنچ جائے گی- انہوںنے کہاکہ پاکستان اور چین نے ہمیشہ اقوام متحدہ کے چارٹر کے مطابق عدل و انصاف ،مساوات اورشفافیت کے اصولوں کی ہمیشہ پابندی کی ہے اور عالمی مسائل پر دونوں ملکوں کے درمیان مکمل ہم آہنگی پائی جاتی ہے-انہوںنے کہاکہ پاکستان کے عوام چین کے ساتھ دوستی کو اہمیت کی نظر سے دیکھتے ہیں اور اس حوالے سے چینی عوام کے پاکستان کیلئے جذبات اور گرم جوشی بھی قابل ذکر ہے – انہوںنے کہاکہ پاکستان جنوبی ایشیاءاور دنیا کو پرامن اور خوشحال بنانے کیلئے چین کے شانہ بشانہ کھڑا ہے-ہمارا یہ پختہ یقین ہے کہ پاکستان اور چین کی موجودہ قیادتیوں کی موجودگی میں دونوں ممالک خطے میں امن اور اپنے عوام کیلئے خوشحالی اور ترقی کے خوابوں کو حقیقت میں بدل سکتے ہیں-